ថ្ងៃចូលឆ្នាំចិន
ពេលខ្ញុំសុំច្បាប់ទៅផ្ទះ កំឡុងពេលចូលឆ្នាំចិនម្នាក់ៗមើលមុខខ្ញុំហើយនិយាយថា អីមុខចឹងចិននឹងគេដែរ? ប្រសិនបើតបបែបសុភាព គឺគ្រាន់តែញឹមដាក់គេទេ បើរបៀបឈ្លើយវិញនឹងសួរបកវិញថា តើធ្ងន់ត្រង់ណាដែរ? ម៉ាក់អ៊ំ ធ្លាប់ប្រាប់ថា កុងមកពីស្រុកចិន មកយកប្រពន្ធនៅស្រុកខ្មែរនេះ ។ ប៉ាខ្ញុំគាត់សម្បុរតៅកឺ (អ្នកអំពេញអត់ស្គាល់ទេ) ហើយខ្ញុំជាកូនស្រី សំណាងល្អ ដែលកាត់ទៅប៉ា ដូចទាំងមុខមាត់ និងសម្បុរ 
។ តែសូមប្រាប់ថាគ្រួសារខ្ញុំក៏ទំលាប់សែន តាំងពីណាពីណីមកម្លេះ។ ហើយកត្តាដែលសំខាន់គឺចូលឆ្នាំចិនគេអោយអាំងប៉ាវមិនចឹង? គឺត្រឡប់ទៅផ្ទះយកអាំងប៉ាវ ខ្ញុំចំលែកដែរ កាលពីនៅតូចៗ ដូចជាមិនចាំថាធ្លាប់បានអាំងប៉ាវសោះ ដល់ពេលមករៀនភ្នំពេញ គឺបានរាល់ឆ្នាំហើយច្រើនៗទៀត (មិនមែនចង់អួតទេគ្រាន់តែប្រាប់) ។
និយាយពីរឿងម្ហូបវិញ គឺមានតែប៉ុន្មានមុខទេដែលម៉ាក់តែងធ្វើប្រចាំឆ្នាំ មីឆា (ឆ្ងាញ់ណាស់) ចាប់ឆាយ (ទូទៅអ្នកណាក៏ធ្វើដែរ) ស្ងោរផ្សិតខ្មៅ (ក៏ឆ្ងាញ់ដែរ) មាន់ស្ងោរ អត់មានជ្រូកខ្វៃទាំងមូលទេព្រោះ ថវិកា តែប្រហែលជាមានពេលសែនផ្នូរ (អត់បានទៅទេ សែនស្តាយអត់បានញ៉ាំជ្រូកខ្វៃ) ។
និយាយពីរឿងលេងបៀរ ចាញ់អស់ជាង២ម៉ឺន T_T ជួយមិនបានទេអារឿងល្បែងអីនឹងគឺខ្ញុំគ្មានសំណាងនោះទេ ។
មកធ្វើការ ចំពេលប្រជុំ គេថាប្រជុំបុគ្គលិក តែមុននឹងប្រជុំគេទិតៀនរឿងចូលឆ្នាំចិនសិន ។ គេថាអ្នកដែលសែនអីនឹងសុទ្ធតែជោរ មិនចង់ធ្វើជាខ្មែរទេ ចង់អួតខ្លួនថាគ្រាន់បើហើយទៅធ្វើជាចិន (ចុះវាទើសអីអ្នកខ្លះដែរ) ខ្ញុំទៅលេងស្រុកវាទើសអ្នកណាដែរ? ខ្ញុំសុំច្បាប់ត្រឹមត្រូវ (អ្នកខ្លះនិយាយថាវាជារឿងផ្ទាល់ខ្លួនមិនគួរមកប៉ះពាល់ការងារអីទេ) ចុះខ្ញុំមិនមែនទាមទារអោយយកបុណ្យនឹងជាបុណ្យជាតិអីណា ខ្ញុំឈប់វាជារឿងរបស់ខ្ញុំ (who are you to judge me?) ដឹងថាគេនិយាយជាទូទៅតែគ្រាន់តែមានអារម្មណ៍មិនសប្បាយចិត្ត ខ្លួនឯងគិតយ៉ាងម៉េចចង់អោយគេគិតតាមធ្វើតាមហ្អី? ម្នាក់គេមានសេរីភាពក្នុងការគិតណា កុំយ៉ាប់ពេក ។ ខឹងពេកទ្រាំមិនបាន តែខ្ញុំក៏មិនតបតគេពេលនឹងទេ ព្រោះគិតថាវាគ្មានតំលៃទៅឈ្លោះជាមួយអ្នកណាទេ អោយតែសកម្មភាព ការគិតរបស់ខ្ញុំមិនបានទៅបំផ្លាញអ្នកណាទៅវាគ្រប់គ្រាន់ហើយ ។
