សុជីវធម៌តាមដងផ្លូវ
ចំពោះការធ្វើដំណើរតាមផ្លូវតើអ្វីដែលជាការសំខាន់ដើម្បីបង្កភាពងាយស្រួលដល់ការបើកបរ? ចម្លើយទីមួយគឹប្រាកដជាច្បាប់ចរាចរណ៍ហើយ តែខ្ញុំគិតថារឿងមួយទៀតដែរសំខាន់គឺថាការមានសុជីវធម៌ និងការអត់ឱនឲ្យគ្នាទៅវិញទៅមក។ កាលពីថ្ងៃមិញនេះពេលខ្ញុំធ្វើដំណើរមកពីសូរិយាមានជនជាតិបរទេសពីរនាក់ដើរឆ្លងផ្លូវ ខ្ញុំក៏បង្អន់ហើយឲ្យពួកគាត់ដើរ មានម្នាក់ដើរហួសហើយតែម្នាក់ទៀតមិនហ៊ានដើរចាំម៉ូតូខ្ញុំសិន តែខ្ញុំនូវមិនព្រមទៅព្រោះខ្ញុំចង់ឲ្យគាត់ឆ្លងសិន ព្រោះខ្ញុំគិតថាចង់ឲ្យគាត់ដើរទៅទាន់គ្នាគាត់ ពេលនោះគាត់ក៏ងក់ក្បាលឲ្យខ្ញុំហើយនិយាយថា “Thank” ខ្ញុំអាចអានអ្វីដែលគាត់និយាយបាន។ ស្នាមញញឹមរបស់គាត់ពិតជាធ្វើឲ្យខ្ញុំមានអារម្មណ៍ល្អនិងសប្បាយចិត្តតាមផ្លូវរហូតមក។ ផ្ទុយទៅវិញ មានពេលខ្លះមានឡានធំៗ ដែលមិនព្រមឲ្យខ្ញុំឆ្លងផ្លូវដោយពួកគេមានការបន្ទាន់ជាខ្លាំងប្រហែលជាប្រពន្ធឆ្លងទន្លេ ឬក៏មានអ្នកណាជិតដាយហើយមើលទៅ សូម្បីតែខ្ញុំឆ្លងមកដល់ពាក់កណ្តាលផ្លូវក៏ពួកគេនោះនៅមិនព្រមឲ្យខ្ញុំទៅមុខនោះទេ។ ចំណុចនេះធ្វើឲ្យខ្ញុំមានអារម្មណ៍មិនល្អ និង ពេលខ្លះលួចជេរ (ព្រោះគេមិនឭ) ។
ដូច្នេះបានជាខ្ញុំគិតថាការមានសុជីវធម៌ ការគោរពអ្នកដទៃ និង ការចេះអត់ឱន វាពិតជាមានសារសំខាន់ខ្លាំងណាស់ បន្ទាប់ពីច្បាប់ចរាចរណ៍ ក្នុងការធ្វើដំណើរតាមផ្លូវ ព្រោះវាអាចការពារគ្រោះថ្នាក់ចរាចរណ៍ ហើយក៏អាចធ្វើឲ្យមនុស្សម្នាក់ទៀតមានអារម្មណ៍ល្អក្នុងការបើកបរដូចជាករណីខ្ញុំជាដើម។
